الثلاثاء، مارس 04، 2014

التجميعة

متشتغلش لحد ولا تبع حد .. اشتغل لنفسك وبس
جملة سمعتها من ناس سلكت الطريق دا ونجحت فيه ، لكن مع الوقت للأسف بيقعوا ، لأن مفيش حد يقدر ينجح من غير ادوات مساعدة او حد معاه يوجهة ، ودا للأسف اللي حصل في الثورة لما كل واحد فينا قال يا رب انا نفسي ، ومحدش قدّر العمل الاجتماعي ولا حاول حتى انه يشارك .. كلنا شاركنا علشان المصلحة وبس .
مع الوقت لقيت انك علشان توصل لدرجة معينة محتاجها من النجاح ، لازم يكون معاك ناس تقف جنبك ، لأن ايد لوحدها متسقفش

الأحد، مارس 02، 2014

عن الورقة

في صباح 15 ابريل 2008 عملت المدونة دي ، واخدت اسم مستعار علشان ملاحقة امن الدولة لأن كان عندي نية لله اني افشخهم :)) ، ما علينا من الكلام دا بس رجعت لذكريات يمكن مش بعيدة حوالي 6 سنين ، حاولت فيهم اثبت وجودي واحقق احلامي اللي حلمتها وانا صغير ، فشلت في حاجات ، ومنجحتش في ولا حاجة الا يمكن الدراسة .، بس ف نفس الوقت مكنش عندي يأس وكنت حاسس ان هيجي يوم وهيغير معنى الحياه على الاقل نسبياً ، واليوم دا ربنا كاتبهولي اني مش هشوفة الا فاجأه ، في خلال ال 6 سنين صاحبت ناس وخاصمت ناس وعرفت ناس وحبيت ناس اعز ناس وخسرتهم ، وكسبت ناس تانية اعز على قلبي ، وكل يوم ياما هنشوف لأن الايام اثبتتلي انها دروس بتعدي علينا وياتستفيد منها يا هتركنك على جنب .. بحاول استفاد منها بأي طريقة ، محاولاتي للوصول لإيجابيات في حياتي والحمدلله فشلت كانت مجرد اجتهاد ، للفشل ، ومقتنعتش بدا الا لما ركزت وحطيت في دماغي كل اللي فات وعصرته وعجنته وطلعت منه مواقف اثبتت لي ان الدنيا لسة هنشوف منها كتير .
بالنسبة للمشاريع اللي دخلت فيها وفشلت فهي كتير ، نقدر نقول فشل بالنسبة للإمكانيات وقلتها ، فشل بالنسبة للموارد البشرية ، فشل بالنسبة ان الحلم كان اكبر من طموحي ، فشل بسببي وبسبب كسلي احياناً ، مقدرتش اركز في شئ لأني كنت بحب حاجات كتير وجربتها .. ، بس زي ما النجاح له لذة .. الفشل برضه له لذتين .. لذة انك بتتعلم منه ، ولذة انك بتصبر وبتقاوح يمكن الزمن يتغير ، بمجرد تفكيرك في طموحاتك .. وتحط علامة اكس على كل المواقف اللي قابلتها في حياتك غلط ، هتلاقي انك بتحققه خطوة خطوة ، الصبر نفعني كتير في الكلام دا .. ولولاه مكنش زماني حققت حاجة من الحاجات اللي نسبتها للنجاح .
اصحي يا مصر مدونة بقالها 6 سنين ، عشت معاها ايامي بحلوها ومرها ، بجمالها وسعادتها وحزنها ، كتبت فيها كل شئ كان بيدور على بالي من غير اصطناع او تزييف او هرتلة زايدة ، يمكن مكنتش  مطور نفسي في الكلام او اللغة بس الحمدلله طورت نفسي ، وحتى لو اخدت بالكم من البوستات القديمة هتلاقوها كدا كلها ، وعلشان انتزع الخوف في يوم من الايام وقبل ثورة يناير غيرت اسمي من اسلام ديو الى اسلام جاويش ، وبعد ما اشتغلت مع حركات سياسية من غير ما انضم ليهم ، ومن شغلانة دي للشغلانة دي ، ودروس بتديهالنا الحياه كل يوم .. ركزت في شئ جه على بالي وحكيته لصديق مقرب ليا مهم ، وقولتله بالنص
انا نفسي اعمل شخصيات جديدة .. تكون ملهمة للناس ، الناس تحبها وتبقى جوا قلوبها .. زي ما جرب ديزني ونجح
مكنتش اتوقع ان "ورقة " بشلن هتعمل الشبه ضجة اللي عملتها على مواقع التواصل الاجتماعي ، ومكنتش اتوقع ان "ظيظو وصفية وصابر وفرج وصفوان " هيدخلوا قلوب الناس دي ، بس زي ما قال والت ديزني ان النجاح ابتدى ب "فار " .. ممكن جداً يبتدي ب " ورقة" .
مش هنسى اليوم اللي كنت سهران فيه على تويتر وزهقي من قاعدة ال 140 حرف ،  وابتديت ادون اول ورقة .. ولما نزلت والناس حبيتها وعملتها ريتويت انبسطت :)) ، وحسيت لأول مرة ان في ناس ناوية تسمعني وتشوف الشئ الجديد ده ، ومن اللطيف ان اول ورقة عملتها ف حياتي كانت دي :

بالمناسبة انا كنت شايف الكاريكاتير بيمر بكذا مرحلة مهمة ، وممكن الرسمة تقعد معايا كاريكاتير ، ابتديت هنا مثلاً على المدونة كنت برسم الرسمة على ورق واخده اسكانر واعدل عليه بالفوتوشوب ، لحد ما اشتريت تابلت بأول فلوس شغل اقبضها ، وبعد كدا اشتريت جهاز بقيت برسم عليه دايركت من خلاله وارفع الرسمة ، التطور حلو برضه مفيش كلام ، بس تعبي مراحش بلاش على المدونة دي .. كل كلمة كتبتها هنا تقريباً ومكنش حد بيبصلها .. اتحولت لإسكتشات واترسمت ووصلت لناس كتير ، يمكن دي اكتر حاجة بسطاني لحد دلوقتي .
منساش ناس كتير وقفت جنبي ، وحبي لشركتي ورئيسها احمد المتولي اللي ساعدتني اوصل للي انا فيه ، محبتي لمصطفى درويش واسامة علي اصحابي واخواتي اللي عملوا اللي عليهم انهم ينجحوا مشروع الورقة :) ، وفريق الاعداد وفريق التحريك ، والناس زمايلي اللي عشت معاهم احلى ايامي ، وابتكرنا حاجات كتير وفشلنا في حاجات اكتر .. بس لسة في امل 
ناس كتير شكرتني اني رسمت البسمة جوا قلوبها .. دا اقل شئ يتعمل معاكم في ظل الاحباط ده ، ولله لو اعرف الموضوع هيأثر فيكم من البداية لكنت عملته لكن حكمة ربنا بقى :) ، ويارب الناس كلها تفضل في سعادة على طول 
الحكاية ابتدت بمدونة ، وصفحة على الفيس بوك ، ودلوقتي بنحضرلها لفيديوهات على اليوتيوب .. وان شاء الله معاها لحد ما توصل برة مصر واحقق طموحي في توصيلها للعالمية ، الورقة كانت مجرد حلم حلمته في يوم من الايام ، من زمان ، ودونته وحكيت عنه بس بصورة غير مباشرة في كتابي "لبن العصفور" ، وان شاء الله احنا معاه لحد ما يكمل :) 

إسلام جاويش

الاثنين، نوفمبر 18، 2013

#ضد_التحرش

في مرة كنت راكب ميكروباص وماشيين في امان الله ، وكان السواق كالعادة واضح ان عقاريت العالم السفلي والعلوي بتلعب كورة على وشه ، من الزحمة ومن الطريق ومن المظاهرات ..،
من ضمن الركاب بنت وقاعد جنبها راجل خمسيني وواضح انه قاعد ومش على بعضه ومسهوك ، لكن من لخبطة المشاوير مبتخليش حد يركز مع حد .
فاجأه لقينا البنت بتنده بصوت عالي وبتطلب من السواق انه يقف ، وقف السواق بعد تردد بسبب الاشارة ، ولقيناها فاجأه بتبص للراجل الخمسيني اللي جنبها وبتقولة : انزل يا حيوان من العربية .
طبعاً عمل فيها من بنها ، وقال لها هو حصل ايه يعني ؟ .. فردت بكل ثقة : تحب اقولهم يا حيوان انت كنت بتعمل ايه ؟
من سوء حظ امه بقى ان اغلب من كان في العربية شباب ، في سنى واكبر مني شوية ..، مسكناه كلنا شتايم وكانت هتوصل للضرب لولا انه نزل وعينه مكسورة ، دا غير التجريس اللي اخده وهو نازل ، وكملنا المشوار عادي جداً .


بس التحرش بالأيدي منتهاش .. لا دا ظهر نوع تاني من التحرش ، دي قصةاسراء محمد في سطور


متضامنين مع #إسراء_محمد

إيه اللى حصل مع إسراء؟ إسراء كانت خارجه من بيتها ونازله على وسط البلد يوم الخميس الساعة تلاتة العصر، وهىّ ماشية فى الشارع حسّت بواحد ماشى وراها بيعاكسها، (شكله مش باين عليه إنه بلطجى؛ لابس قميص مكوى وجزمة متلمّعة)، قالت خلاص يبقى بيعاكس يعنى زى غيرة. بعدها قالها على فكرة أنا مش بعاكس، وإمسحى بنطلونك! ماخدتش فى بالها ومشيت راحت المترو. وهى راكبه المترو حسّت بنار فى جسمها. أول مانزلت دخلت كافيه فى وسط البلد عشان تشوف إيه اللى حصلها ده، كان هيُغم عليها من الألم. إسراء روّحت البيت وشافت جسمها إنهارات. تقرير الطبيب بيقول إن اللى حصل لإسراء حروق من الدرجة الأولى والثانية والثالثة مع وجود غرغرينة فى بعض الأجزاء. المادّة الكاوية اللى إترشت على إسراء معموله بإحترافيه شديدة؛ زمان كان أى مادّة بتسبّب حرق للملابس فى البداية وكان بيتم كشف الأمر بسهولة. هنا فى حالة إسراء المادّة إخترقت الملابس من غير ماتسيب أى آثر فيها ودخلت على الجلد مباشرًة، والمفعول نفسه بدأ بعد ربع ساعة من كلمة الشخص اللى كان ماشى وراها "إبقى أمسحى بنطلونك!"
على حسب اللى شوفته إن ماينفعش إسعافات أوليّة للأسف، ودرجات الحروق شديدة جدًا. وده حصل فى خلال دقايق يعنى صعب الحالات دى تتلحق. اللى بيحصل إرهاب ومالوش أى تفسير تانى، والحالة دى إتكرّرت كتير فى الكام إسبوع اللى فاتوا بس مش بنفس الوحشيّة اللى حصلت مع إسراء.


 لو شفت بنت بتواجه التحرش ساعدها وهتلاقي اللي هيساعدك ، لكن سكوتك ممكن يعرض اختك او قريبتك او اي بنت تعرفها للأذى بعد كدا
جميع الحقوق محفوظة لمدونة اصحى يا مصر

الاثنين، نوفمبر 04، 2013

شقع بقع يا ديل الفار

يا شعب مصر يا خم النوم
متفوق بقى .. وتشوفلك يوم
دي الثورة قامت في الخرطوم
وانت اللي نايم في المندار #هع
الشيخ امام - احمد فؤاد نجم

السبت، أغسطس 24، 2013

الى المزايدين ... اسمعوني وحياة ابوكو

في الايام الاخيرة شفت كتير من المزايدين ، بس اللي مكنتش اتوقعه اني الاقي مزايدة من ناس بتدعي انها ثوار ، وضد الانقلاب (بس مش عارف بصراحة اذا كان قصدهم انقلاب على الشرعية ولا على حاجة تانية) ، مزايدة على الناس اللي نزلت في 25 يناير ، مزايدة على الناس اللي نزلت في معارك الثورة من اول ماسبيرو لحااااد الاتحادية وتضامنت مع 30 يونيو ، وتوصل انهم يوصفوهم ب "لاحسي البيادة" وخانو العهد ، في الحقيقة هما مش عايزين يقولوها قدام الناس صريحة انهم "مش اخوان بس بيحترموهم" .. فقولت اكتب النوت دي وهزايد عليهم .. لكن بحقايق ولله مش لمجرد وصف كاذب وتصنيف احمق . في البداية .. انت عارف الاخوان عملوا ايه علشان تزايد .. عارف احنا بنكرههم ليه؟   1- عمر ما حد انجر للعنف في 25 يناير الا لما الداخلية ابتدت العنف ، حتى بعد الانفلات الامني في 28 يناير ابتدينا نشوف مشاهد قتل متظاهرين في موقعة الجمل وما بعدها بتزيد ، وعلى اثرها كان رحيل مبارك ، انا ليه مشفتش ولاد مبارك اللي انا بكرههم نزلو وواجهو بعنف زي ما احنا بنشوف الايام دي من الاخوان؟؟ ! 2- من 8 ابريل فض اعتصام التحرير لحد ماسبيرو ، مجلس الوزراء ، محمد محمود ، القصر العيني ، كنا بنقول يسقط يسقط حكم العسكر في ظل ان الاخوان كانو بينزلوا يحشدوا في التحرير و يحتفلوا ب 25 يناير اللي كان لسة دم الشهداء منشفش ولا حقهم رجع ... نازلين ببلالين ويهتفو الجيش والشعب ايد واحدة ! . 3- طنطاوي اللي كنت كل يوم تقول عليه سفاح ، صاحب اشهر المدابح في تاريخ مصر ، وباقي قادة المجلس العسكري ، نسيت ان مرسي كرمهم ب "قلادة النيل"؟؟ طب ناسي ان في محور سماه مرسي بمحور "المشير طنطاوي" ؟؟ ليه مثورتش وقولت ان مرسي خان الثورة ؟؟ مسمعتلكش صوت ساعتها ! 4- سحل البنت لما قالوا عليه فوتوشوب ! ، ضرب البنات اللي بينزلوا المظاهرات ، شكوكهم بإعتصاماتنا ، خلاص نسيت تشويههم للثوار ؟ 5- خيانة الاخوان للثوار في محمد محمود ، لما رفضو يشاركو ضد انتهاكات المجلس العسكري في جمعة الفرصة الاخيرة اللي حصل بسببها المجزرة ؟فاكر لما كان كل واحد حاطت ايده ف ايد العسكر واحمد حراره بياخد الرصاص في عينه ، وفي النهاية يقولوا على احمد حرارة باع القضية !  6- عمرك شفت الثوار راحو يفضوا اعتصام لولاد مبارك ؟ او حتى وقفة ؟ او مظاهرة ؟ ..تصدق بقى ان الاخوان راحو يفضوا اعتصام سلمي ؟ اه ولله .. فضوا اعتصام الناس اللي وقفت جنبيهم في محنتهم وهما في السجون ! .. فضوا اعتصام الاتحادية وبكل وحشية . 7- فاكر لما حررناهم من سجون امن الدولة؟ .. واول ما مسكو السلطة حطوا الثوار في السجون زي زيزو وابو ادم ودومة وحسن مصطفى ! 8- يا اخي داحنا كنا بنقول "الثورة مستمرة" كانوا بيتريقوا ! ، على نغمة الاصلاح وعجلة الانتاج ولما تيجي تقول لهم : فين القصاص والعيش والحرية والعدالة الاجتماعية ؟ يرجعوا لنفس النغمة تاني !  9-زي ما الداخلية فضت اعتصام رابعة و النهضة واتقتل ناس غلابة ، زي ما الداخلية هجمت على الناس في التحرير بعد كارثة الاعلان الدستوري من سيمون بوليفار والقصر العيني ، زي ما قتلت ناس كتير كان منهم جيكا في ذكرى محمد محمود . * في نقط كتير ولله بس الواحد استكفى بدول بس للتذكير ليس إلا ، ومش هتخلص في نوت او اتنين او تلاتة بالنسبة للعسكر :  كلنا ضد ان العسكر يحكم  ، متخليش العسكر ينسيك اللي عملوه الاخوان فينا ،.. انا اللي شايفه انها حكومة انتقالية ، بتعمل دستور ، مجلس شعب قريب ، ليها خريطة طريق ماشية عليها .. هننزل كلنا ننتخب ونختار رئيس مدني محترم يحترم الاقليات ويهتم بالطبقات ويراعي مؤسسات الدولة ويشكل حكومة ائتلاف وطني .ولو معملش دا هننزل ضده ! عارف ان انت بسبب الهاجس اللي جواك بالنسبة للعسكر ، بتدي فرصة للإخوان انهم يستغلوك لقضيتهم ؟فهل ترضى انك تكون مع طرف كل يومين تلاتة يستقوى بالخارج ؟ طرف بيستغل الأطفال لصراع سياسي ؟ طرف عمره ما احترم القانون او عمل بيه ؟ طرف عمره ما احترم البلد اللي هو فيها ويكسر ويعتصم بسلاح ويعتدي على المنشأت الخاصة وعلى سكان المناطق بالقوة ؟ -انت انساني ؟؟ وبتقول الدم حرام ؟؟ واللي حصل في الاخوان حرام ؟؟ على عيني وعلى راسي .. بس زي ما في مدبحة المنصة والحرس الجمهوري ورابعة .. افتكر ان في مدبحة اسمها بين السرايات والمنيل محدش جاب سيرتها ولا اخدت حقها اعلامياً وعالمياً زي اللي فاتو ،.. ومات منها شباب كتير ، افتكر الجنود اللي كل يوم تموت في سينا ، افتكر مشهد الطفل اللي سحلوه ورموه من عمارة ابو قير..مش هتخسر لما توزع انسانيتك على الكل . النهاية بقى :   متصنفش حد ارجوك ... زي ما الطرف دا عنده اخطاء زي ما الطرف التاني عنده نفس الاخطاء وربما ازيد ، واللي بيته من أزاز ميحدفش الناس بالطوب  ، تصنيفك في حد ذاته مش بيقلل من المشكلة دا بيكبرها وبيصنع منها جوا كل واحد كراهية للتاني . عايز تأيد .. أيد ، عايز تقول حكومة انقلاب .. قول ، عايز تقول يا لاحس البيادة .. قول، مش عايز تعترف انك بتحترم الاخوان . براحتك ..، بس متجيش في النهاية وتقول انا محايد .. ، لأن المحايد بيشوف بعينه الاتنين .. مش بعين واحدة !  انا انسانيتي مش اقل من انسانيتك على فكرة ، وكلنا ولاد بلد واحدة ، وعارف ان اللي ماتو في رابعة والحرس والمنصة ضحايا صراع سياسي هما مالهمش اي دخل فيه .. دول ناس حبوا يعيشوا ويصرفوا على نفسيهم ، وعندهم قضية ، وبالنسبة لكلمة "ضحايا" دي فأكيد انت شايف حال قادة الاخوان قبل واثناء الاعتصام كانو بيقولوا ايه .. ودلوقتي بيقولوا ايه!دا في منهم بيقول انه مش اخوان ! ، وفي منهم بيقول انه ميعرفش ان الاعتصام مسلح! ، وفي منهم بيقول انه ضد مرسي شفت القادة باعت الناس ازاي من اول سؤال في التحقيقات؟ باعت دم الناس وباعت القضية ببأرخص تمن   كل واحد حاطت فكره في دماغه ومتمسك بيها لدرجة انه ممكن يموت لأجلها .. وانا بقول انت تقدر تؤمن بالفكرة بس من غير ما تعرض نفسك للخطر .. تمن التضحية غالي ، ادفعه في معركة كسبانة مش خسرانة .Like

الاثنين، أغسطس 19، 2013

افهم معايا ، بإختصار .. سبب البلاوي اللي احنا فيها


خد بالك معايا احنا في فترة مبارك عانينا كتير من الارهاب 
فاكر حادثة شيماء اللي شعب مصر كله عيط عليها في 1993؟
حادثة اغتيال فرج فودة 1992 ، اغتيال رفعت المحجوب 1990 .
مدبحة الأقصر 1997 ، مدبحة شرم الشيخ 2005 ، ومؤخراً كنيسة القديسين 2011
وتوالت بعدها المدابح زي ما احنا شفنا النهاردة بشكل بشع وحقير .

لو تاخد بالك تاني هتلاقي ان اغلب الحوادث دي حصلت بعد اغتيال السادات على يد "الجماعات الإسلامية المتطرفة" ومبارك مسك الحكم ، طبعاً كان واجب على مبارك انه يستخدم الحل الامني ، لكن بما انه غبي استخدمه بشكل وقح من خلال امن الدولة ... بس هل الارهاب وقف ؟؟ هل الحل الأمني جاب نتيجة ؟؟؟؟

تقريباً مفيش سنة عدت على مصر بدون حادثة ارهابية ، وبالذات خلال حكم مبارك ، لأن الحل الأمني "لوحده" مجابش نتيجة .
دا كله كان بسبب اختيار الحرب العسكرية كعلاج للإرهاب ، وتجاهل حل الحرب الفكرية ، والفساد التعليمي .. والتعذيب في سجون امن الدولة ، دا كله انعكس على الواقع وخلق الافكار المتطرفة .

الحل الامني كان مجرد صد لبكتريا التطرف ، وتسكين لآلام الوطن ، لكن عمره ما كان علاج للإنهاء على فكرة التطرف.

هتقولي مهو حل "الحرب الفكرية" هياخد وقت طويل اوي وسنين .. ،
هقولك انت جسمك مصاب بفيروس .. وقدامك حل من الاتنين .. ، يا تاخد مُسكن يصد الألم بس الألم هيرجع كل فترة ، يا تاخد علاج هيقضي على الفيروس تماماً بعد وقت قد يتجاوز سنين ..
او ممكن تستخدم الاتنين مع بعض بشكل متوازي ، ومتوازن ، بدون انتهاكات .. ساعتها هتقضي على الفيروس في اقل وقت وبأقل خساير !

جميع الحقوق محفوظة لمدونة اصحى يا مصر

مننساش فرج فودة بس

عندما اغتيل فرج فودة الكاتب الشهير على ايدي بعض الارهابيين سنة 1992 من خلال فتوى اصدرها شيخ من شيوخ جماعة الجهاد ، وبعد القبض على القاتل سأله القاضي قائلاً :

* لماذا اغتلت فرج فودة ؟
القاتل : لأنه كافر.
- ومن أي من كتبه عرفت أنه كافر ؟
القاتل : أنا لم أقرأ كتبه.
- كيف ؟
القاتل :أنا لا أقرأ ولا أكتب .

الجهل اللي نسيناه واتزرع في مجتمعنا هو سبب البلاوي دي كلها ، وكل يوم بندفع تمنه دم غالي ،.. تخيل ؟
حل الحرب العسكرية كويس جداً لكن هو مش علاج هو مجرد مُسكن 
الحل الأمثل - من وجهة نظري - "حرب فكرية"

شهادتي عن احداث فض اعتصام رابعة من الداخلية 16-8-2013 بالصور

واللي حصل كالتالي : 
كنت في الهجوم اللي تم من ناحية طيبة مول 

حوالي الساعة 6 الا ربع نزلت انا وبعض الزملاء المصورين بعد ما جتلنا اخبار ان في قوات كتير اتحركت ناحية رابعة العدوية وواضح ان هيكون في فض ، طبعاً انا مكنتش مصدق . 
الساعة 6 وعشرة وصلنا لحد التوحيد والنور (قبل اعتصام رابعة بمترات) ، ولاحظت ان في استنفار امني شديد حوالين المكان .. بعدها بدقايق لقينا راجل بدقن بيجري وبيقول وهو بيترعش "الداخلية جاية من الشارع الخلفي - الموازي لشارع النصر"
روحنا للشارع ولقينا فعلاً قوات كتير بدأت تدخل مسلحين بغاز وخرطوش وآلي ، والضرب كله كان عبارة عن غاز مسيل للدموع ومكنش في استخدم للخرطوش او الألي 

 

حاولنا نطلب من القيادات اللي كانت موجودة اننا نصور قالولنا "مش وقته" 
رجعنا تاني لنفس الشارع (مدخل طيبة مول) اللي كنا فيه لقينا قوات كتير جداً (حوالي 10 تشكيلات امن مركزي- 6 مدرعات - كاسحتين مصفحين - وعربية شايلة جهاز بيصدر اصوات غبية جداً (من احدث وسائل فض الاعتصامات في العالم وسعره غالي جداً )


طبعاً الاخوان حطو اطارات واشعلوها في اقل من دقيقة قدام مدخل الاعتصام ، وتراجعوا ناحية الدشم (السور الرملي اللي بنوه) ، والجنود اعتلت المباني العسكرية كلها في ثانية وعلى مرة واحدة .. واول ما الكاسحات دخلت تكسر والغاز بدأ يشتغل ملقتش ولا واحد واقف عند الاسوار دي وجريوا كلهم لحد مسجد رابعة .


لقيت بنت منتقبة حاولت تحتك مع الظباط ، بكل امانة الظابط اتعامل معاها بذوق وحاول يمشيها من مكان الاشتباك لكنها رفضت .. اللي حزنني من جوايا بجد الست اللي وقفت بين الشرطة والاخوان ، ولما جت ناحية الشرطة الظباط حاولوا يمشوها من مكان الاشتباك لكنها مرضيتش وكملت .. الست محصلهاش اي حاجة وكنت مراقبها بعنيا .

مرحلة الهجوم كانت عبارة ان الكاسحات المصفحة بتدخل تشيل اي حاجة قدامها ، والعساكر والجنود وراها .. وكل ما تتقدم كل ما الحشود دي بتتراجع ، وبيحاولوا يصدوها بالطوب ، وكانت بتكسر اي حاجة قدامها بحيث تفتح طريق للمدرعات بالتقدم .
الظباط بدأو يفتشوا الخيم ويشوفوا فيها حد ولا لا ، كل الخيم مكنش فيها مخلوق وانا دخلت معاهم وكان موجود في بعض الخيم "انابيب بوتجاز ، تلفزيونات ، اجهزة كهربائية والكترونية مختلفة ، صناديق كبيرة جداً فيها اقنعة غاز وخوذ ، كتيبات صغيرة كانت بتتوزع على المعتصمين فيها عبارات زي الانقلاب ، الانقلابيين ، محمد مرسي المظلوم ، اسعافات اولية) ، الشخص الوحيد اللي لقيته مرمي على الارض جريت عليه علشان اشوفه مصاب ولا ميت ولا ايه ، عليه اثار دم وبيربش بعنيه وكان صاحي وبيرفع رجله اتأكدت انه زي الفل مفيهوش حاجة ، اول ماشافنا بكاميرات راح عامل نفسه ميت ورافع ايده لفوق وبيشاور بصباعه على السما علشان ناخد له لقطة درامية ! (الصورة المنتشرة على الفيس بوك)

عساكر الامن المركزي كسروا كل الخيم بعد تفتيشها بالكامل، واي حاجة كانت بتتصادر ، حتى كان في اكشاك بيع بيبسي وكوكاكولا والحاجات الخفيفة دي اتاخد كل اللي فيها 

دخلنا نصور عادي جداً وساعتها محدش اتكلم معانا وكانو سايبننا نصور براحتنا ، ومشفتش حد اعترضنا ، بدأ ساعتها الاخوان يحتشدوا بشكل كبير قرب مسجد رابعة وبدأو في صد الهجوم بالطوب .. سمعت صوت ضرب آلي شديد جداً معرفش الصوت جاي من اي ناحية ، الظباط اللي قدامي كانو بيضربوا غاز بس كان الضرب بغباء ، حوالي قنبلتين كل دقيقة والضرب مهديش . .. لحد ما لقيت المدرعات وقفت فاجأه وبدأت الداخلية تضرب خرطوش ! ، لاحظت أن الكاسحات المصفحة وهي بترجع بدأ ازازها يتكسر عرفت ان الاخوان بدأو يستخدموا اسلحة نارية .
https://www.facebook.com/photo.php?fbid=528823197186194&set=a.528822530519594.1073741843.100001755563477&type=3&theater
https://www.facebook.com/photo.php?fbid=528910493844131&set=a.528822530519594.1073741843.100001755563477&type=3&theater
https://www.facebook.com/photo.php?fbid=528823003852880&set=a.528822530519594.1073741843.100001755563477&type=3&theater
https://www.facebook.com/photo.php?fbid=528910547177459&set=a.528822530519594.1073741843.100001755563477&type=3&theater
https://www.facebook.com/photo.php?fbid=528910493844131&set=a.528822530519594.1073741843.100001755563477&type=3&theater
https://www.facebook.com/photo.php?fbid=528919187176595&set=a.528822530519594.1073741843.100001755563477&type=3&theater
في نفس الساعة دي مقدرتش اشوف الصف الاول للأخوان اللي كان واضح جداً قدامي ، دخان الحريق كان كتير جداً ، لكن شفت شظايا الخرطوش "البلي" جاي من ناحية الاخوان ، وكنت هصاب بطلقة بس الحمدلله جت سليمة ، مصطفى درويش حتى اتلسع لسعتين في ايده من الشظايا .

لقيت فاجأه ظابط بيقولي "انت بتصور ظباط ليه؟" ، قلتله انا بصور اللي قدامي! ، المهم الظابط كان في الاول عايز ياخد مني الكاميرا لكن بمساعدة الزملاء وظباط معاه قالي مش هاخدها منك بس امسح اي صورة ظاهر فيها ظباط ، ومن هنا بدأت المعاملة الزبالة معايا منهم بس مهتمتش وقعدت اصور.

نفس المشهد الدرامي الاول حصل تاني .. ، بعد ما القوات تقدمت شوية شفت راجل بدقن مرمي على الارض قدامنا وغرقان دم ، متأكدتش هو مات ولا لا لأنه كان بعيد .. راح عليه راجل علشان يشيلة ، بدل ما يسحبه ناحيتهم علشان يسعفه فضل ماسكه بأيده على الارض (موثق بالصور) مدة طويلة جداً كأنه بيقولنا تعالوا صوروا وخدوا الكادرات اللي عايزينها . 
https://www.facebook.com/photo.php?fbid=529286153806565&set=a.528822530519594.1073741843.100001755563477&type=3&theater
(ملحوظة : صورة اللي انزلت في الانديبندنت مش بتاعتي ، مصور تاني صورها)

رجعت بقى لأن ساعتها كان الاعتصام اتفض بنسبة 75% ، صوت ضرب اي حاجة تتخيلها ف حياتك شغال ، خرطوش غاز وآلي .. ، قولت اخدلي كام صورة كدا قبل ما امشي لقيت تاني مرة ظابط ملثم بيقولي انت بتصور ايه ؟ وفين كارنيهك ..؟ اخدني للقائد بتاعه وطلعت كارنيه الشغل واتفرج على شوية صور .. قعد يهزر وقالي كفاية كدا بقى تصوير هتصور ايه ما خلاص الدنيا بح .

فعلاً كانت الدنيا بح .. مشيت لقيت لتالت مرة ظابط ماسك ألي راح واقفلي وقالي لو ممشتش من هنا هطخك برصاصة في دماغك ! كملت مشي ومردتش ، رغم اني كنت راجع المكتب خلاص .

نفس اللي حصل معايا حصل مع صحفيين تانيين واكتر منهم مصطفى درويش ، حتى وانا خارج لقيت ان عربية ارسال اون تي في اتصادر منها الكاميرا ومقدرتش تدخل الاعتصام .

عدد من شباب الاخوان اللي كانو بينضربوا واتقفشوا اعتقلوا ، ملحقتش للأسف اصورهم علشان كنت مهتم باللي بيحصل قدامي ، لكن الشباب صوروهم.

لحد اللحظة دي انا مشفتش حد انضرب ومات قدامي ..

وصلت المكتب حوالي الساعة 9 الا عشرة .

السبت، يونيو 29، 2013

رسائل ما قبل 30 يونيو ..


رتب حاجاتك ، الكوفية والمَتاع
الخميرة والقناع ..
ويافطة كبيرة مكتوب عليها
النهاردة يوم الوداع
وانت نازل ، خليك سعيد
اوعى تخاف
ولما الاعداد تلاقيها تزيد
ادخل جوا مود الهتاف
-----
في الميدان ، بوس الأرض 
اللي سقاها دم الشهيد
ورَشها بشوية وّرد
وفهمه ..
ان النهاردة يوم جديد
يوم يعيد حقه بجد



#رسائل_ماقبل_30يونيو

جميع الحقوق محفوظة لمدونة اصحى يا مصر

الأربعاء، مايو 15، 2013

اعرف اذا كانت الصورة متفبركة ولا فوتوشوب

الايام اللي فاتت كان بيتنشر على الفيس بوك وتويتر صور كتير ، احياناً ناس بتموت يقولك انهم من بورما وهما من بلاد تانية ، واحياناً يكون من سوريا وهما اصلاً من بورما ، واحياناً يقولك علياء المهدي ماتت ! ، وكتييييييييير جداً بيحصل ابتزاز للبنات من شخصيات وسخة هدفها الفضيحة مثلاً ! .. انهم يعملوا تعديل على الصور بصور ابيحة وينشروها ، وطبعاً علشان نحط حد للمهزلة دي ونشوف فعلاً مين اللي على حق ومين اللي بيكدب .. دلوقتي جبتلكم 3 طرق مضمونة جداً جداً تقدر بيهم انك تعرف اذا كانت الصورة دي متفبركة ولا صورة اتعدل عليها بالفوتوشوب ولا صورة عادية جداً .. من غير لا سحر ولا شعوذة :)

1- اول طريقة هي عن طريق برنامج صغير جداً بس مفيد جداً اسمه : JPEG Gsnoop
تحميل البرنامج .. من اللينك ده : http://www.mediafire.com/?q2q3x3a88584y82
البرنامج ده بيديلك تقرير مفصل عن الصورة ، التقطت امتى ، وبأي كاميرا ، وفي اي وقت ، وممكن يقولك كانت فين (وسعت مني دي شوية :D ) ، ومن ضمن المعلومات دي أهم معلومة وهي معرفة اذا كانت الصورة اتعدل عليها بالفوتوشوب ولا متفبركة ولا محدش جه ناحيتها خالص !
هنجيب صورتين ونعمل عليهم مثال ، واحدة اتفوتوشبتت .. والتانية الاصلية

دي صورة في الاستوديو :)) قبل ما يتعملها تعديل على الفوتوشوب


دي نفس الصورة بس بعد الفوتوشوب .. واضح اوي 

تعالوا نشوف البرنامج هيكتشفهم ازاي؟؟؟

نجرب الصورة الأصلية الأول .. هنلاقي مكتوب تحت Uncertain if processed or original
ومكتوب باقي التفاصيل طبعاً نوعية الكاميرا ، ووقت الصورة بالساعة بالدقيقة ، 
الأمهم من دا كله في التفاصيل بعد Uncertain if processed or original
هتلاقي مكتوب قدامة خانة Software اسم البرنامج اللي تم اختبار الصورة عليه
لو الصورة اصلية هتلاقي الاسم كدا زي في الصورة اللي تحت Ver.1.01
ودا معناه انه تم اختبارها ببرنامج الويندوز العادي جداً .. 
 بعد تجربة الصورة الأصلية ، وعرفنا معلومات عنها .. تعالوا بقى نجرب الصورة المتعدلة على الفوتوشوب ونشوف البرنامج هيلقطها ازاي ؟؟


طبعاً وضحت اوي ، مكتوب بجانب Software اسم الفوتوشوب منور اهوه ، وتحت كمان هتلاقوا ان في فرق في التاريخ بين الصورة الاصلية والصورة اللي اتعدلت ، ودا معناه ان البرنامج سجل اخر مرة اتعمل للصورة فيها تعديل ..
بالنسبة للكلمة اللي تحت Image is processed/edited
ودا معناه ان الصورة اتعدل عليها ...

 2- الطريقة التانية وهي مفتكسة شوية بس كويسة ، عن طريق موقع fotofonmics
طريقة ظريفة لكنها غير ناجحة في انها توضحلك هي الصورة دي تمام ولا لا بنسبة 70 %
كل الحكاية انها بتعكس اللون ، وبتحاول انها تطلعلك اخطاء الصورة حتى ولو كانت عيوب تصوير

3 - الطريقة التالتة عن طريق جوجل صور
http://images.google.com


جميع الحقوق محفوظة لمدونة اصحى يا مصر

السبت، أبريل 27، 2013

سقاني الغرام

سقاني الغرام كأساً من الحب صافياً ياليته لما سقاني سقاكم ♥متى يا كرام الحي عيني تراكم وأسمع من تلك الديار نداكم سقاني الغرام كأساً من الحب صافياً ياليته لما سقاني سقاكم أمرّ على الأبواب من غير حاجة لعلي أراكم أو أرى من يراكم سقاني الغرام .. سقانى الهوى كأساً من الحب صافياً ياليته لما سقاني سقاكم

الجمعة، أبريل 26، 2013

مبحبش الوداع


مش معنى ان ينزل من عينك بعض نقاط الدموع ، مع حضن .. مع رفع ايدك بالسلام .. انك مش هتشوف اللي كان قريب منك في يوم من الايام تاني
مش معنى انك تفتكر كل لحظة عدت عليكم كأنها فيلم اكشن او في شريط مليان مواقف وتبكي على فراقها .. انك هتفتقد المواقف دي
مش معنى انك لسة محتفظ بصورة كل ما يوحشك تشوفه ، وتنزل نفس الدمعتين مع نفس الحضن ..ان الصورة دي مش هتشوفها تاني على الحقيقة ,
مش معنى انك تزعل وتحزن على هزاركم ، وقوفكم جنب بعض في الحلوة والمرة ، انك مش هتحس بطعم الهزار ده تاني ، ولا هتشوف اي حد يقدر يعمل اللي كان هو بيعمله .
مش معنى انك تتحسر على كل دقيقة حلوة عشتها ، وكل مشهد جميل حسيته معاه .. ان اللحظات دي ماتت وهتموت كل دقيقة حلوة.
مش معنى انك تقعد تولول لحظة الفراق ، وتحس انك الشخص اللي منسجم معاه وبتحبه خلاص هيبقى بعيد عنك ..ان كل شئ معاه هيروح وهيبعد

بإختصار .. لو كان حبيبك او قريبك او صديقك .. ارضالله انه يعيش حر وبخير وحياه سعيده
ولو حتى كان فراقكم بسبب زعل او قدر
ولو كان راح للي خلقه ، افتكر انك هترجع له تاني في يوم من الأيام ، وهتشوفه ..
الصورة حلوة ، بس مسيرها ف يوم تروح زي ما راحت معاه
والدمعتين مش من قيمته ، لإنهم ممكن ينزلوا في اي موقف محزن عادي
والحضن مش كفاية .. لإنه السبب في انه بيملكك شعور بالفقدان
ولا الحسرة ولا الولولة ولا اللحظات الحلوة ، ولا اي شئ يكفي
ولا اي شئ هيخليه يرجع ..
لكن في الحقيقة .. زي منير ما قال .. مسير الحي يتلاقى
ولذلك انا متفائل
ولذلك برده انا بكره الوداع ، علشان كدا مبودعش اللي بحبهم
لأني متأكد اني هشوفهم في يوم من الأيام ..
وان كان ميت او حي .. سلم عليه ، وأكد عليه انك هتشوفه تاني
لكن لا تودعه .. لأن الوداع يعتبر النهاية !

جميع الحقوق محفوظة لمدونة اصحى يا مصر

السبت، يناير 26، 2013

ذكرى الثورة !

بيموت ناس علشان تعيش ناس
بس في ناس بتسرق حلم الناس
ومفيش اساس مبني عليه احساس
ان اللي يقتل في يوم
بكره ينوله قصاص

الأربعاء، نوفمبر 28، 2012

صورة من محمد محمود

من زمان وانا نفسي اوثق كل شئ حصل في الثورة بالصور بس للأسف ملحقتش لأن مكنش معايا امكانيات ساعتها
بس على العموم دي مش الفكرة :) خلينا في الايام دي
انا جبت النهاردة مجموعة صور من محمد محمود والميدان ، لو حابب تتفرج عليهم بدقة عالية كل ما عليك انك تضغط على الصورة
نبدء نحكي بقى 
يوم 19 نوفمبر 2012 
احتفالية عادية زي اي احتفالية تأبين شهداء ، بس المرة دي كانت في شارع محمد محمود بس ، بصراحة كانت شديدة جداً انا شخصياً اخدت فيها صور كتير هنزلها ان شاء الله في بوست لوحدها 
نزلنا اليوم دا واحنا عارفين ان هيحصل حاجة ، كان لسة حوار الاعلان الدستوري والهري اللي فيه دا مجاش بس فعلاً كنا متوقعين اشتباكات بين الثوار والامن وده اللي فعلاً حصل 
انا متفق ان القصاص لازم يتاخد وكل واحد ياخد حقه ، في من الشباب اللي زل اصحاب ناس ماتت في محمد محمود 1 و 2 ولحد دلوقتي القضاء الشريف مجابش حقهم ، قعدو يضربوا الامن بالطوب فتعاطفت معاهم العيال الصغيرة وكله بقى بيلب الامن بالطوب 
ودا كان جزء من الاحتفالية اللي مكملتش اساساً لأن الداخلية بدأت في الضرب ..
تاني يوم اتجددت الاشتباكات والداخلية ترد بالغاز واحيانا الخرطوش
وتالت ورابع نفس الحكاية مع دخول شارع القصر العيني محيط الاشتباكات
وبعدها جت كارثة الاعلان الدستوري المكمل بتاع مرسي اللغريب
وبعدها القوى المدنية نزلت الشارع تعارض .. وتصاعد حدة الاشتباكات لأن الاعداد كترت طبعا
القوى المدنية اخدت خطوة انها هتعتصم حتى اسقاط الاعلان الدستوري المكمل 
ودلوقتي الاعتصام مفتوح .. وفي اراء انه ينفتح حتى اسقاط النظام 
دايماً في كل بوست كدا بحب اعمله مقدمة كبيرة ، فمتزعلوش من الرغي بتاعي 
تعالو احكيلكم عن قصة الصور



الصورة دي كانت تاني يوم اشتباكات عند مدرسة الاليسية ، الامن كان بيضرب من فوق السطح واحنا بنحتمي في حتة حديد صاج علشان تبعد عننا القنابل


الصورة دي انا :)) وانا في التحرير وكان ساعتها الداخلية عاملة حرب في القصر العيني وبتضرب غاز بكثافة من المدرعات . ورايا ديفيد عبد النور مراسل شبكة اخبار مصر وصديقي الصدوق .. ساعتها كانت كل الناس بتجري من الغاز واحنا بس اللي بنجري ورا الغاز علشان نتصور معاه :))


شباب القصر العيني .. بيولعوا النار علشان تحميهم من الغاز ، مع شوية تدفئة لأن الجو كان تلج .. مع الضرب يعني وكدا كانت بتدي باور جامد .


دا محمد محمود من الداخل ، عند الاليسيه ، ودي بقايا الحرب من طوب وعصيان وحاجات كدا .. طبعاً دا شكل الشارع ساعة الاشتباكات تحس انه ساحة حرب


صورة تانية للشارع 


دي صورة من القنابل اللي كانت بتتحدف علينا ، مش مكتوب عليها اي شئ ولا معروف دي ايه بس المهم انها بتحرق وبتخليك تعيط والله اعلم ان كان فيها مواد بتثير الاعصاب ولا لا .. بس هي قوية جداً لأني مجربها وغير كدا انها مبتنضربش غير من بندقية خرطوش زي الخرطوش كدا بس وساختها انها بتجري في كل مكان لحد ما تفضي اللي جواها


محمد محمود .. بعد الهدنة ، من عند مكتبة الجامعة الامريكية القديمة


المكان دا كنا بنقف نحتمي فيه من الغاز ، ودي اثار الغاز 


دول الاطفال اللي كنت بحكي عنهم في تويتر ، رغم انهم صعبانين عليا بجد وشايف انهم مينفعوش في المواجهات دي بس لما اخدتلهم الصورة وهما بيدفوا وفي منهم اللي نايم .. حسيت بتعبهم ..
وهو دا الواد اللي لما سألته انتا جاي هنا تعمل ايه ؟ قالي بنعمل ثورة على مرسي علشان الفقرا واحنا فقرا


من شارع القصر العيني :) استراحة المحاربين 


نأسف على غباء الصورة ، بس انا بجد كنت بشوف الاشارة كل شوية تتغير رغم ان الشارع مقفول ومفيش اي حاجة ، كتير بقى اللي يقولك دي سيمات عاملنها الامن علشان يضربوا علينا في اوقات معينة ، وفي اللي يقولك مش عارف ايه
انا قولت اخطفها صورة .. معرفش بتعبر عن ايه بس هي صورة 


نيجي في التقيل بقى .. محمد محمود لحظة الاشتباكات والمولوتوف  ، صحيح .. العيال كانت بتجيب بنزين المولوتوف من العربيات المركونة :) فكروني بمقولة : الجيش قالك اتصرف


دي بعد ما ضربوا المولوتوف بس الهدف مصابش حاجة يعتبر .. لأن الجنود كانو كلهم فوق


دي صورة اخدتها للخرفان 


دي القنبلة اللي حكيتلكم عليها في صورة فاتت .. بتنضرب على ناس عاديين جداً ومواطنين حتى مش متظاهرين 


واحد مصاب الشباب بيحاولوا يلحقوه . في طريقهم للمستشفى الميداني


شباب بيحاول يساعد الناس من تفادي الغازات المسيلة للدموع 


مسيرة حزب الدستور في الجمعة اللي فاتت .. كانت حلوة ولله وكان فيها واحد بيطبل .. هنزل صورته البوست الجاي


المجد للشهداء .. والموت للجبناء ، من مسيرة الدستور 


اوعى تغرك دقنك يا مرسي .. رسالة من مواطن لمرسي 



نرجع تاني لمحمد حودة .. الشباب ولعوا في شوية خشب كتير علشان يتفادو بيه الغازات المسيلة .. بيقولوا انه بيقلل منها بس عن تجربة لا قل منها ولا بتنجان 


عموما .. الخشب بعد ما اتولع عمل هالة كدا نارية كان شكلها حلو .. اخدتها بكذا وضع 


دي صورة تانية ليها كمان 

عندي حوالي 150 صورة بحاول افلتر منهم اللي اقدر عليه .. ويارب يعنني وانزل البوست التاني في اقرب فرصة وااتابع معاهكم لحظة بلحظة 
هحاول افلتر على قد ما اقدر وارفع واكتب البوستات على قد ما اقدر 

جميع الحقوق محفوظة لمدونة اصحى يا مصر