الجمعة، مايو 16، 2014

خش قول رأيك في الحكومة



القاهرة 19 اكتوبر 2012
الجزء الأول : 
كان عم محسن عاملاً للنظافة في أحد المراحيض العامة ، لا يحب السياسة وغير متابع لأخبار البلد ولا يعلم حتى ما تعنيه كلمة "حكومه" ، ورغم مرتبه الذي لايكفي بشراء نصف كيلو لحم إلا أنه كان يُرزق احياناً بالكام جنيه الذي يعطيه الزائرون له بمقابل بعض الادعية  .

ذات مرة ، وبعد تشكيل حكومة هشام قنديل بأشهر قليلة لاحظ عم محسن زيادة في زيارات الناس على الحمامات فتعجب ، وقال وعيناه عليها علامات الشفقة : هو قد كدا الشعب مزنوق !! ، حتى خرج الواحد تلوا الاخر وكانوا يرددون الكلمات التالية : الحمدلله ..الله يخربيتك يا حكومة كنت هعملها على نفسي في الشارع ! ، وقال احدهم : مش مصدق! .. اخيراً الواحد يمشي وهو حر ..يا حكومة وسخة ، وقال الثالث وهو يلوح بيده لصديقه في الطابور : خش قول رأيك في الحكومة الجديدة ..

تكاثرت الاموال في يد عم محسن لأول مره ، وكل من يعطيه جنيه يرد عليه بدعاء : ربنا يكرمك يا بيه ويخليك ويخلي عيالك، ويخربيت ام الحكومة ! .
وكل من يعطيه نصف جنيه : ربنا يكرمك يا ريس ، ويديك الصحة .. ويلعن ابو ام الحكومة .
وكل من يعطيه اكثر من ذلك : روح يا شيخ ربنا ياخد الحكومة باللي فيها ! .
رأى عم محسن ان الدعاء على الحكومة ليس له فائدة فالرزق بيد الله ، فأخذ الكلمة التي قالها احد  المزنوقين سابقاً لصديقه " خش قول رأيك في الحكومه " ، بكتابتها على لافتة وتغيير بعض كلماتها حتى اصبحت " أدخل وقول رأيك في الحكومة بكل أمانه" ثم وضعها على باب المراحيض .. فكان استقباله للمزنوقين يفوق الخيال ! 
حيث جمع في هذا اليوم فقط ما يقرب لبناء عمارة في الزمالك ! ، وفي اسبوع واحد كان معه ما يكفيه من المال لهيكلة مستقبله الخاص في مشروع جديد ، فقرر بإستثمار تلك الاموال في مشروع مفيد يعود بدخل عليه أكبر ، وبعد تفكير في كشك او محل بقالة ، رأى أن كل هذه المشاريع معادتش جايبة همها وجميعها افكار مستهلكة ،  فقام ببناء مرحاض عام دورين ، الطابق الاول وضع فيه لافته تحمل عنوان : إيه بقى رأيك في الريس؟؟ ، فكان استقباله للجماهير حافلاً ، والطابق الثاني كان خاص بالحريم فكان استقباله للجماهير حافلاً ايضاً ، ووعده اصحاب الشهرة والمجد عند زيارته في الافتتاح انهم سيلجأون إليه عند الزنقة .

بعد ان اصبح عم محسن من اصحاب الاموال .. وامضاءه على تمرد .. وبعد قيام 30-6 ، وفرحته بالإنجاز الكبير وعودة الشرطة في صفوف الشعب ، كانت المفاجأه لا يتحملها أحد ، فلا يعد هناك مزانيق وكأن الشعب فك كل ما لديه في التانك ، وكان التردد على المكان ضعيف جداً .. ولكن من فرحة عم محسن لم ينتبه لذلك فقرر بخلع لافتة " ايه بقى رأيك في الريس " ايماناً انه بقى بيجيب الفقر ! .. وبدلها بأغنية "تسلم الأيادي" بإستمرار ، فعادت عجلة المزانيق الى طبيعتها كما في السابق وبشكل قوي واسرع ولكن ليس بنفس العائد المادي الذي كان يقابله في الماضي ، حتى انتهى اليوم بأمان وجاء الان دوره في تنظيف المكان ليعلن انتهاء يومه .
دخل عم محسن الى الداخل وبيده الجردل والمساحة .. فلاحظ كتابات بالأسود على الأبواب فذهب ليقوم بمسحها واعادة ترتيب المكان .. يتفاجأ بجملة مكتوبة بالأسبراي الأسود على حوائط المراحيض من الداخل  : ارحل يا سيسي ، مرسي رئيسي !.

الثلاثاء، مارس 04، 2014

التجميعة

متشتغلش لحد ولا تبع حد .. اشتغل لنفسك وبس
جملة سمعتها من ناس سلكت الطريق دا ونجحت فيه ، لكن مع الوقت للأسف بيقعوا ، لأن مفيش حد يقدر ينجح من غير ادوات مساعدة او حد معاه يوجهة ، ودا للأسف اللي حصل في الثورة لما كل واحد فينا قال يا رب انا نفسي ، ومحدش قدّر العمل الاجتماعي ولا حاول حتى انه يشارك .. كلنا شاركنا علشان المصلحة وبس .
مع الوقت لقيت انك علشان توصل لدرجة معينة محتاجها من النجاح ، لازم يكون معاك ناس تقف جنبك ، لأن ايد لوحدها متسقفش

الأحد، مارس 02، 2014

عن الورقة

في صباح 15 ابريل 2008 عملت المدونة دي ، واخدت اسم مستعار علشان ملاحقة امن الدولة لأن كان عندي نية لله اني افشخهم :)) ، ما علينا من الكلام دا بس رجعت لذكريات يمكن مش بعيدة حوالي 6 سنين ، حاولت فيهم اثبت وجودي واحقق احلامي اللي حلمتها وانا صغير ، فشلت في حاجات ، ومنجحتش في ولا حاجة الا يمكن الدراسة .، بس ف نفس الوقت مكنش عندي يأس وكنت حاسس ان هيجي يوم وهيغير معنى الحياه على الاقل نسبياً ، واليوم دا ربنا كاتبهولي اني مش هشوفة الا فاجأه ، في خلال ال 6 سنين صاحبت ناس وخاصمت ناس وعرفت ناس وحبيت ناس اعز ناس وخسرتهم ، وكسبت ناس تانية اعز على قلبي ، وكل يوم ياما هنشوف لأن الايام اثبتتلي انها دروس بتعدي علينا وياتستفيد منها يا هتركنك على جنب .. بحاول استفاد منها بأي طريقة ، محاولاتي للوصول لإيجابيات في حياتي والحمدلله فشلت كانت مجرد اجتهاد ، للفشل ، ومقتنعتش بدا الا لما ركزت وحطيت في دماغي كل اللي فات وعصرته وعجنته وطلعت منه مواقف اثبتت لي ان الدنيا لسة هنشوف منها كتير .
بالنسبة للمشاريع اللي دخلت فيها وفشلت فهي كتير ، نقدر نقول فشل بالنسبة للإمكانيات وقلتها ، فشل بالنسبة للموارد البشرية ، فشل بالنسبة ان الحلم كان اكبر من طموحي ، فشل بسببي وبسبب كسلي احياناً ، مقدرتش اركز في شئ لأني كنت بحب حاجات كتير وجربتها .. ، بس زي ما النجاح له لذة .. الفشل برضه له لذتين .. لذة انك بتتعلم منه ، ولذة انك بتصبر وبتقاوح يمكن الزمن يتغير ، بمجرد تفكيرك في طموحاتك .. وتحط علامة اكس على كل المواقف اللي قابلتها في حياتك غلط ، هتلاقي انك بتحققه خطوة خطوة ، الصبر نفعني كتير في الكلام دا .. ولولاه مكنش زماني حققت حاجة من الحاجات اللي نسبتها للنجاح .
اصحي يا مصر مدونة بقالها 6 سنين ، عشت معاها ايامي بحلوها ومرها ، بجمالها وسعادتها وحزنها ، كتبت فيها كل شئ كان بيدور على بالي من غير اصطناع او تزييف او هرتلة زايدة ، يمكن مكنتش  مطور نفسي في الكلام او اللغة بس الحمدلله طورت نفسي ، وحتى لو اخدت بالكم من البوستات القديمة هتلاقوها كدا كلها ، وعلشان انتزع الخوف في يوم من الايام وقبل ثورة يناير غيرت اسمي من اسلام ديو الى اسلام جاويش ، وبعد ما اشتغلت مع حركات سياسية من غير ما انضم ليهم ، ومن شغلانة دي للشغلانة دي ، ودروس بتديهالنا الحياه كل يوم .. ركزت في شئ جه على بالي وحكيته لصديق مقرب ليا مهم ، وقولتله بالنص
انا نفسي اعمل شخصيات جديدة .. تكون ملهمة للناس ، الناس تحبها وتبقى جوا قلوبها .. زي ما جرب ديزني ونجح
مكنتش اتوقع ان "ورقة " بشلن هتعمل الشبه ضجة اللي عملتها على مواقع التواصل الاجتماعي ، ومكنتش اتوقع ان "ظيظو وصفية وصابر وفرج وصفوان " هيدخلوا قلوب الناس دي ، بس زي ما قال والت ديزني ان النجاح ابتدى ب "فار " .. ممكن جداً يبتدي ب " ورقة" .
مش هنسى اليوم اللي كنت سهران فيه على تويتر وزهقي من قاعدة ال 140 حرف ،  وابتديت ادون اول ورقة .. ولما نزلت والناس حبيتها وعملتها ريتويت انبسطت :)) ، وحسيت لأول مرة ان في ناس ناوية تسمعني وتشوف الشئ الجديد ده ، ومن اللطيف ان اول ورقة عملتها ف حياتي كانت دي :

بالمناسبة انا كنت شايف الكاريكاتير بيمر بكذا مرحلة مهمة ، وممكن الرسمة تقعد معايا كاريكاتير ، ابتديت هنا مثلاً على المدونة كنت برسم الرسمة على ورق واخده اسكانر واعدل عليه بالفوتوشوب ، لحد ما اشتريت تابلت بأول فلوس شغل اقبضها ، وبعد كدا اشتريت جهاز بقيت برسم عليه دايركت من خلاله وارفع الرسمة ، التطور حلو برضه مفيش كلام ، بس تعبي مراحش بلاش على المدونة دي .. كل كلمة كتبتها هنا تقريباً ومكنش حد بيبصلها .. اتحولت لإسكتشات واترسمت ووصلت لناس كتير ، يمكن دي اكتر حاجة بسطاني لحد دلوقتي .
منساش ناس كتير وقفت جنبي ، وحبي لشركتي ورئيسها احمد المتولي اللي ساعدتني اوصل للي انا فيه ، محبتي لمصطفى درويش واسامة علي اصحابي واخواتي اللي عملوا اللي عليهم انهم ينجحوا مشروع الورقة :) ، وفريق الاعداد وفريق التحريك ، والناس زمايلي اللي عشت معاهم احلى ايامي ، وابتكرنا حاجات كتير وفشلنا في حاجات اكتر .. بس لسة في امل 
ناس كتير شكرتني اني رسمت البسمة جوا قلوبها .. دا اقل شئ يتعمل معاكم في ظل الاحباط ده ، ولله لو اعرف الموضوع هيأثر فيكم من البداية لكنت عملته لكن حكمة ربنا بقى :) ، ويارب الناس كلها تفضل في سعادة على طول 
الحكاية ابتدت بمدونة ، وصفحة على الفيس بوك ، ودلوقتي بنحضرلها لفيديوهات على اليوتيوب .. وان شاء الله معاها لحد ما توصل برة مصر واحقق طموحي في توصيلها للعالمية ، الورقة كانت مجرد حلم حلمته في يوم من الايام ، من زمان ، ودونته وحكيت عنه بس بصورة غير مباشرة في كتابي "لبن العصفور" ، وان شاء الله احنا معاه لحد ما يكمل :) 

إسلام جاويش

الاثنين، نوفمبر 18، 2013

#ضد_التحرش

في مرة كنت راكب ميكروباص وماشيين في امان الله ، وكان السواق كالعادة واضح ان عقاريت العالم السفلي والعلوي بتلعب كورة على وشه ، من الزحمة ومن الطريق ومن المظاهرات ..،
من ضمن الركاب بنت وقاعد جنبها راجل خمسيني وواضح انه قاعد ومش على بعضه ومسهوك ، لكن من لخبطة المشاوير مبتخليش حد يركز مع حد .
فاجأه لقينا البنت بتنده بصوت عالي وبتطلب من السواق انه يقف ، وقف السواق بعد تردد بسبب الاشارة ، ولقيناها فاجأه بتبص للراجل الخمسيني اللي جنبها وبتقولة : انزل يا حيوان من العربية .
طبعاً عمل فيها من بنها ، وقال لها هو حصل ايه يعني ؟ .. فردت بكل ثقة : تحب اقولهم يا حيوان انت كنت بتعمل ايه ؟
من سوء حظ امه بقى ان اغلب من كان في العربية شباب ، في سنى واكبر مني شوية ..، مسكناه كلنا شتايم وكانت هتوصل للضرب لولا انه نزل وعينه مكسورة ، دا غير التجريس اللي اخده وهو نازل ، وكملنا المشوار عادي جداً .


بس التحرش بالأيدي منتهاش .. لا دا ظهر نوع تاني من التحرش ، دي قصةاسراء محمد في سطور


متضامنين مع #إسراء_محمد

إيه اللى حصل مع إسراء؟ إسراء كانت خارجه من بيتها ونازله على وسط البلد يوم الخميس الساعة تلاتة العصر، وهىّ ماشية فى الشارع حسّت بواحد ماشى وراها بيعاكسها، (شكله مش باين عليه إنه بلطجى؛ لابس قميص مكوى وجزمة متلمّعة)، قالت خلاص يبقى بيعاكس يعنى زى غيرة. بعدها قالها على فكرة أنا مش بعاكس، وإمسحى بنطلونك! ماخدتش فى بالها ومشيت راحت المترو. وهى راكبه المترو حسّت بنار فى جسمها. أول مانزلت دخلت كافيه فى وسط البلد عشان تشوف إيه اللى حصلها ده، كان هيُغم عليها من الألم. إسراء روّحت البيت وشافت جسمها إنهارات. تقرير الطبيب بيقول إن اللى حصل لإسراء حروق من الدرجة الأولى والثانية والثالثة مع وجود غرغرينة فى بعض الأجزاء. المادّة الكاوية اللى إترشت على إسراء معموله بإحترافيه شديدة؛ زمان كان أى مادّة بتسبّب حرق للملابس فى البداية وكان بيتم كشف الأمر بسهولة. هنا فى حالة إسراء المادّة إخترقت الملابس من غير ماتسيب أى آثر فيها ودخلت على الجلد مباشرًة، والمفعول نفسه بدأ بعد ربع ساعة من كلمة الشخص اللى كان ماشى وراها "إبقى أمسحى بنطلونك!"
على حسب اللى شوفته إن ماينفعش إسعافات أوليّة للأسف، ودرجات الحروق شديدة جدًا. وده حصل فى خلال دقايق يعنى صعب الحالات دى تتلحق. اللى بيحصل إرهاب ومالوش أى تفسير تانى، والحالة دى إتكرّرت كتير فى الكام إسبوع اللى فاتوا بس مش بنفس الوحشيّة اللى حصلت مع إسراء.


 لو شفت بنت بتواجه التحرش ساعدها وهتلاقي اللي هيساعدك ، لكن سكوتك ممكن يعرض اختك او قريبتك او اي بنت تعرفها للأذى بعد كدا
جميع الحقوق محفوظة لمدونة اصحى يا مصر

الاثنين، نوفمبر 04، 2013

شقع بقع يا ديل الفار

يا شعب مصر يا خم النوم
متفوق بقى .. وتشوفلك يوم
دي الثورة قامت في الخرطوم
وانت اللي نايم في المندار #هع
الشيخ امام - احمد فؤاد نجم

الأربعاء، مايو 15، 2013

اعرف اذا كانت الصورة متفبركة ولا فوتوشوب

الايام اللي فاتت كان بيتنشر على الفيس بوك وتويتر صور كتير ، احياناً ناس بتموت يقولك انهم من بورما وهما من بلاد تانية ، واحياناً يكون من سوريا وهما اصلاً من بورما ، واحياناً يقولك علياء المهدي ماتت ! ، وكتييييييييير جداً بيحصل ابتزاز للبنات من شخصيات وسخة هدفها الفضيحة مثلاً ! .. انهم يعملوا تعديل على الصور بصور ابيحة وينشروها ، وطبعاً علشان نحط حد للمهزلة دي ونشوف فعلاً مين اللي على حق ومين اللي بيكدب .. دلوقتي جبتلكم 3 طرق مضمونة جداً جداً تقدر بيهم انك تعرف اذا كانت الصورة دي متفبركة ولا صورة اتعدل عليها بالفوتوشوب ولا صورة عادية جداً .. من غير لا سحر ولا شعوذة :)

1- اول طريقة هي عن طريق برنامج صغير جداً بس مفيد جداً اسمه : JPEG Gsnoop
تحميل البرنامج .. من اللينك ده : http://www.mediafire.com/?q2q3x3a88584y82
البرنامج ده بيديلك تقرير مفصل عن الصورة ، التقطت امتى ، وبأي كاميرا ، وفي اي وقت ، وممكن يقولك كانت فين (وسعت مني دي شوية :D ) ، ومن ضمن المعلومات دي أهم معلومة وهي معرفة اذا كانت الصورة اتعدل عليها بالفوتوشوب ولا متفبركة ولا محدش جه ناحيتها خالص !
هنجيب صورتين ونعمل عليهم مثال ، واحدة اتفوتوشبتت .. والتانية الاصلية

دي صورة في الاستوديو :)) قبل ما يتعملها تعديل على الفوتوشوب


دي نفس الصورة بس بعد الفوتوشوب .. واضح اوي 

تعالوا نشوف البرنامج هيكتشفهم ازاي؟؟؟

نجرب الصورة الأصلية الأول .. هنلاقي مكتوب تحت Uncertain if processed or original
ومكتوب باقي التفاصيل طبعاً نوعية الكاميرا ، ووقت الصورة بالساعة بالدقيقة ، 
الأمهم من دا كله في التفاصيل بعد Uncertain if processed or original
هتلاقي مكتوب قدامة خانة Software اسم البرنامج اللي تم اختبار الصورة عليه
لو الصورة اصلية هتلاقي الاسم كدا زي في الصورة اللي تحت Ver.1.01
ودا معناه انه تم اختبارها ببرنامج الويندوز العادي جداً .. 
 بعد تجربة الصورة الأصلية ، وعرفنا معلومات عنها .. تعالوا بقى نجرب الصورة المتعدلة على الفوتوشوب ونشوف البرنامج هيلقطها ازاي ؟؟


طبعاً وضحت اوي ، مكتوب بجانب Software اسم الفوتوشوب منور اهوه ، وتحت كمان هتلاقوا ان في فرق في التاريخ بين الصورة الاصلية والصورة اللي اتعدلت ، ودا معناه ان البرنامج سجل اخر مرة اتعمل للصورة فيها تعديل ..
بالنسبة للكلمة اللي تحت Image is processed/edited
ودا معناه ان الصورة اتعدل عليها ...

 2- الطريقة التانية وهي مفتكسة شوية بس كويسة ، عن طريق موقع fotofonmics
طريقة ظريفة لكنها غير ناجحة في انها توضحلك هي الصورة دي تمام ولا لا بنسبة 70 %
كل الحكاية انها بتعكس اللون ، وبتحاول انها تطلعلك اخطاء الصورة حتى ولو كانت عيوب تصوير

3 - الطريقة التالتة عن طريق جوجل صور
http://images.google.com


جميع الحقوق محفوظة لمدونة اصحى يا مصر

السبت، أبريل 27، 2013

سقاني الغرام

سقاني الغرام كأساً من الحب صافياً ياليته لما سقاني سقاكم ♥متى يا كرام الحي عيني تراكم وأسمع من تلك الديار نداكم سقاني الغرام كأساً من الحب صافياً ياليته لما سقاني سقاكم أمرّ على الأبواب من غير حاجة لعلي أراكم أو أرى من يراكم سقاني الغرام .. سقانى الهوى كأساً من الحب صافياً ياليته لما سقاني سقاكم

الجمعة، أبريل 26، 2013

مبحبش الوداع


مش معنى ان ينزل من عينك بعض نقاط الدموع ، مع حضن .. مع رفع ايدك بالسلام .. انك مش هتشوف اللي كان قريب منك في يوم من الايام تاني
مش معنى انك تفتكر كل لحظة عدت عليكم كأنها فيلم اكشن او في شريط مليان مواقف وتبكي على فراقها .. انك هتفتقد المواقف دي
مش معنى انك لسة محتفظ بصورة كل ما يوحشك تشوفه ، وتنزل نفس الدمعتين مع نفس الحضن ..ان الصورة دي مش هتشوفها تاني على الحقيقة ,
مش معنى انك تزعل وتحزن على هزاركم ، وقوفكم جنب بعض في الحلوة والمرة ، انك مش هتحس بطعم الهزار ده تاني ، ولا هتشوف اي حد يقدر يعمل اللي كان هو بيعمله .
مش معنى انك تتحسر على كل دقيقة حلوة عشتها ، وكل مشهد جميل حسيته معاه .. ان اللحظات دي ماتت وهتموت كل دقيقة حلوة.
مش معنى انك تقعد تولول لحظة الفراق ، وتحس انك الشخص اللي منسجم معاه وبتحبه خلاص هيبقى بعيد عنك ..ان كل شئ معاه هيروح وهيبعد

بإختصار .. لو كان حبيبك او قريبك او صديقك .. ارضالله انه يعيش حر وبخير وحياه سعيده
ولو حتى كان فراقكم بسبب زعل او قدر
ولو كان راح للي خلقه ، افتكر انك هترجع له تاني في يوم من الأيام ، وهتشوفه ..
الصورة حلوة ، بس مسيرها ف يوم تروح زي ما راحت معاه
والدمعتين مش من قيمته ، لإنهم ممكن ينزلوا في اي موقف محزن عادي
والحضن مش كفاية .. لإنه السبب في انه بيملكك شعور بالفقدان
ولا الحسرة ولا الولولة ولا اللحظات الحلوة ، ولا اي شئ يكفي
ولا اي شئ هيخليه يرجع ..
لكن في الحقيقة .. زي منير ما قال .. مسير الحي يتلاقى
ولذلك انا متفائل
ولذلك برده انا بكره الوداع ، علشان كدا مبودعش اللي بحبهم
لأني متأكد اني هشوفهم في يوم من الأيام ..
وان كان ميت او حي .. سلم عليه ، وأكد عليه انك هتشوفه تاني
لكن لا تودعه .. لأن الوداع يعتبر النهاية !

جميع الحقوق محفوظة لمدونة اصحى يا مصر

السبت، يناير 26، 2013

ذكرى الثورة !

بيموت ناس علشان تعيش ناس
بس في ناس بتسرق حلم الناس
ومفيش اساس مبني عليه احساس
ان اللي يقتل في يوم
بكره ينوله قصاص

الأربعاء، نوفمبر 28، 2012

صورة من محمد محمود

من زمان وانا نفسي اوثق كل شئ حصل في الثورة بالصور بس للأسف ملحقتش لأن مكنش معايا امكانيات ساعتها
بس على العموم دي مش الفكرة :) خلينا في الايام دي
انا جبت النهاردة مجموعة صور من محمد محمود والميدان ، لو حابب تتفرج عليهم بدقة عالية كل ما عليك انك تضغط على الصورة
نبدء نحكي بقى 
يوم 19 نوفمبر 2012 
احتفالية عادية زي اي احتفالية تأبين شهداء ، بس المرة دي كانت في شارع محمد محمود بس ، بصراحة كانت شديدة جداً انا شخصياً اخدت فيها صور كتير هنزلها ان شاء الله في بوست لوحدها 
نزلنا اليوم دا واحنا عارفين ان هيحصل حاجة ، كان لسة حوار الاعلان الدستوري والهري اللي فيه دا مجاش بس فعلاً كنا متوقعين اشتباكات بين الثوار والامن وده اللي فعلاً حصل 
انا متفق ان القصاص لازم يتاخد وكل واحد ياخد حقه ، في من الشباب اللي زل اصحاب ناس ماتت في محمد محمود 1 و 2 ولحد دلوقتي القضاء الشريف مجابش حقهم ، قعدو يضربوا الامن بالطوب فتعاطفت معاهم العيال الصغيرة وكله بقى بيلب الامن بالطوب 
ودا كان جزء من الاحتفالية اللي مكملتش اساساً لأن الداخلية بدأت في الضرب ..
تاني يوم اتجددت الاشتباكات والداخلية ترد بالغاز واحيانا الخرطوش
وتالت ورابع نفس الحكاية مع دخول شارع القصر العيني محيط الاشتباكات
وبعدها جت كارثة الاعلان الدستوري المكمل بتاع مرسي اللغريب
وبعدها القوى المدنية نزلت الشارع تعارض .. وتصاعد حدة الاشتباكات لأن الاعداد كترت طبعا
القوى المدنية اخدت خطوة انها هتعتصم حتى اسقاط الاعلان الدستوري المكمل 
ودلوقتي الاعتصام مفتوح .. وفي اراء انه ينفتح حتى اسقاط النظام 
دايماً في كل بوست كدا بحب اعمله مقدمة كبيرة ، فمتزعلوش من الرغي بتاعي 
تعالو احكيلكم عن قصة الصور



الصورة دي كانت تاني يوم اشتباكات عند مدرسة الاليسية ، الامن كان بيضرب من فوق السطح واحنا بنحتمي في حتة حديد صاج علشان تبعد عننا القنابل


الصورة دي انا :)) وانا في التحرير وكان ساعتها الداخلية عاملة حرب في القصر العيني وبتضرب غاز بكثافة من المدرعات . ورايا ديفيد عبد النور مراسل شبكة اخبار مصر وصديقي الصدوق .. ساعتها كانت كل الناس بتجري من الغاز واحنا بس اللي بنجري ورا الغاز علشان نتصور معاه :))


شباب القصر العيني .. بيولعوا النار علشان تحميهم من الغاز ، مع شوية تدفئة لأن الجو كان تلج .. مع الضرب يعني وكدا كانت بتدي باور جامد .


دا محمد محمود من الداخل ، عند الاليسيه ، ودي بقايا الحرب من طوب وعصيان وحاجات كدا .. طبعاً دا شكل الشارع ساعة الاشتباكات تحس انه ساحة حرب


صورة تانية للشارع 


دي صورة من القنابل اللي كانت بتتحدف علينا ، مش مكتوب عليها اي شئ ولا معروف دي ايه بس المهم انها بتحرق وبتخليك تعيط والله اعلم ان كان فيها مواد بتثير الاعصاب ولا لا .. بس هي قوية جداً لأني مجربها وغير كدا انها مبتنضربش غير من بندقية خرطوش زي الخرطوش كدا بس وساختها انها بتجري في كل مكان لحد ما تفضي اللي جواها


محمد محمود .. بعد الهدنة ، من عند مكتبة الجامعة الامريكية القديمة


المكان دا كنا بنقف نحتمي فيه من الغاز ، ودي اثار الغاز 


دول الاطفال اللي كنت بحكي عنهم في تويتر ، رغم انهم صعبانين عليا بجد وشايف انهم مينفعوش في المواجهات دي بس لما اخدتلهم الصورة وهما بيدفوا وفي منهم اللي نايم .. حسيت بتعبهم ..
وهو دا الواد اللي لما سألته انتا جاي هنا تعمل ايه ؟ قالي بنعمل ثورة على مرسي علشان الفقرا واحنا فقرا


من شارع القصر العيني :) استراحة المحاربين 


نأسف على غباء الصورة ، بس انا بجد كنت بشوف الاشارة كل شوية تتغير رغم ان الشارع مقفول ومفيش اي حاجة ، كتير بقى اللي يقولك دي سيمات عاملنها الامن علشان يضربوا علينا في اوقات معينة ، وفي اللي يقولك مش عارف ايه
انا قولت اخطفها صورة .. معرفش بتعبر عن ايه بس هي صورة 


نيجي في التقيل بقى .. محمد محمود لحظة الاشتباكات والمولوتوف  ، صحيح .. العيال كانت بتجيب بنزين المولوتوف من العربيات المركونة :) فكروني بمقولة : الجيش قالك اتصرف


دي بعد ما ضربوا المولوتوف بس الهدف مصابش حاجة يعتبر .. لأن الجنود كانو كلهم فوق


دي صورة اخدتها للخرفان 


دي القنبلة اللي حكيتلكم عليها في صورة فاتت .. بتنضرب على ناس عاديين جداً ومواطنين حتى مش متظاهرين 


واحد مصاب الشباب بيحاولوا يلحقوه . في طريقهم للمستشفى الميداني


شباب بيحاول يساعد الناس من تفادي الغازات المسيلة للدموع 


مسيرة حزب الدستور في الجمعة اللي فاتت .. كانت حلوة ولله وكان فيها واحد بيطبل .. هنزل صورته البوست الجاي


المجد للشهداء .. والموت للجبناء ، من مسيرة الدستور 


اوعى تغرك دقنك يا مرسي .. رسالة من مواطن لمرسي 



نرجع تاني لمحمد حودة .. الشباب ولعوا في شوية خشب كتير علشان يتفادو بيه الغازات المسيلة .. بيقولوا انه بيقلل منها بس عن تجربة لا قل منها ولا بتنجان 


عموما .. الخشب بعد ما اتولع عمل هالة كدا نارية كان شكلها حلو .. اخدتها بكذا وضع 


دي صورة تانية ليها كمان 

عندي حوالي 150 صورة بحاول افلتر منهم اللي اقدر عليه .. ويارب يعنني وانزل البوست التاني في اقرب فرصة وااتابع معاهكم لحظة بلحظة 
هحاول افلتر على قد ما اقدر وارفع واكتب البوستات على قد ما اقدر 

جميع الحقوق محفوظة لمدونة اصحى يا مصر

الثلاثاء، نوفمبر 20، 2012

ندرت الندر يا طاهرة #محمد_محمود

ندرت الندر يا طاهرة .. ماسيب وقفة ولا مظاهرة

بإختصار ... محمد محمود




me , at mohammed mahmoud street
مش هطول عليكم في الكلام
دخلت على تويتر من التاب بتاعي امبارح لما كنت بنقل اخبار الضرب ، ولقيت عالم كنت فاكر لحد قترة قصيرة انها ناس بتفهم وعندها عقلية لكن للأسف طلعوا ولاد كلب ولا يفهموا .. اسف لقلة ادبي بس دي الحقيقة .
العالم دي دخلت تكتب وتشتم في الشباب اللي كانو بينضربوا امبارح ، والاسئلة العامة اللي كانت متاحة امبارح :
1- هما ليه راحوا اصلاً ( بيفكروني بسؤال الاخوان المستفز ايام احداث مجلس الوزرا)
2- هما ليه بيعملوا كدا ؟؟ ( سؤال عبيط وكتير قالوه )
3- انتو عايزين ايه ؟ تضيعوا الثورة ؟  :)))
كان ناقص يقولوا ان الاحداث دي فوتوشوب ! :D
ما علينا ، بغض النظر عن اللي قالوه البهايم وتفكير البهايم والتفكير البهيمي والحميري اللي شوفته امبارح بكترة على تويتر والفيس ، ياريت نرجع كدا لسنتين الا شهر ورا .. من 25 يناير 2011 .. ، مش هقولك من اول ما خالد سعيد مات اللي لسة مطلعلوش شهادة وفاة لحد دلوقتي .. مع احترامي للشهيد خالد سعيد .. نحسب من ساعة 25 يناير لحد دلوقتي ...
يعني احداث الثورة يموت 800 واحد ومحدش في النظام القديم يتحاسب ، لما يموت في ماسبيرو ومحمد محمود 1 ، 2 ومجلس الوزرا والعباسية وبورسعيد حوالي 200 - 300 واحد ! ، ولما يتصاب ويعتقل الألاف من الشباب اللي هما اساس الثورة، ولما طنطاوي القاتل ومعاه عنان ياخدو براءات رغم انهم السبب ، ولما يجيلنا رئيس لا هو من الثورة ولا هو من الناس اللي دعوا لها ، ولما الفساد يفضل موجود في الداخلية وفي جميع الوزارات ، ولما تسيطر جماعة على دولة بكل مواردها واحتياجاتها ..يبقى المفروض نعمل ايه ؟.
في البداية كانوا بينادو بمطالب شرعية ، حلموا بيها وكان طموح يوصلوا لأهدافهم ، حسوا بالتغيير وقت ما كل الناس كانت بتطاطي للنظام الجديد ..
ولكن في ناس كتير ركبوا على حلمهم
ناس تضامنوا معاهم لتحقيق مصالح شخصية وبعد ما حققوها سابوهم
جت الداخلية .. وقتلوهم
جه الجيش .. واعتقلوهم
يعني لما حاولوا يحلموا انضربوا واتقتلوا واعتقلوا .. ادوهم فرصة يحلموا بأديهم
لكل فعل رد فعل ، وفعل الداخلية والنظام ما ورد على اي فعل شوفته في حياتي
زي بالضبط بلونة عمال تنفخها بغباء .. بغباء .. بغباء ، هيجيلها وقت وهتفرقع في وشك
الشباب كانوا بينادو بالعيش والحرية والعدالة الاجتماعية
دلوقتي مبينادوش غير بشئ واحد
بحق الشهيد والمصابين والمعتقلين اللي نادو بالعيش والحرية والعدالة الاجتماعية
وللأسف حقهم لسة مجاش ، وحلمهم لسة متحققش
يبقى ميزعلش النظام من الانتقام
كفاية كدا

دا فيديو بيوضح حجم الاشتباكات
جميع الحقوق محفوظة لمدونة اصحى يا مصر

الثلاثاء، أغسطس 28، 2012

رسائل من مغرور 1


انا انتي .. انا حبيبتي
انا سيرتك .. انا حكايتك
انا سيرتي اللي محكية في اول باب في قصايدك
انا عوايدك  انا طبيعتك انا عقلك
انا جنونك لما تنعكشي شعرك
انا خواطرك انا شعورك ..
انا قلمك لما بتكتبي سطورك
انا غرورك..
 انا ضفورك ..
انا الوردة اللي مالية الارض بعطورك
انا نورك انا نهارك ..
انا وياكي طول الليل ..انا جوارك
انا ضميرك انا عذابك .. انا حضورك انا غيابك
 انا الكائن في عز البرد عمال بخبط على بابك
انا الرسمة اللي موهومة على شفايفك ..
 انا الرعشة اللي بتحسيها ساعة ما تحضني كفوفك
انا عشقك انا صوتك انا جنونك...
انا جفنك انا روحك انا عيونك...
انا البسمة اللي بين النن ورموشك ..
انا صباحك انا رباحك انا جمالك انا طموحك ..
.انا املك انا سامعك ..انا وداعك انا رجوعك..
انا دماغك انا فكرك انا قربك انا الاصحاب ..
انا حبيبك انا قريبك انا كلمة ف محل اعراب .. 
انا عشقتك بدون اسباب .....

انا وجودك .
انا عاينك انا حافظك انا أصلك  
انا صاينك من اللي ما يصلي حسودك
انا الضحكة اللي مزروعة بين الحُسن وخدودك
انا الفرحة اللي ممنوعة من التكشير
انا الحاجة اللي محتاجة تكون لحدودك
انا مجموعة من كلام وحروف كتير
انا مالك انا حالك انا فكرك انا بالك
انا اللي بّميل راسي على راسك واقول مالك ؟؟
انا خيالك انا سؤالك انا جوابك
انا سهرك انا نومك انا تعبك انا راحتك
انا بيتك انا مكانك انا شارعك انا عنوانك
انا همك على عيالك
انا بردك انا نارك .. انا الخطوة في قرارك
انا جّدك انا هزارك
انا حلاوتك.. انا مرارك
انا الحفاظ بأسرارك
انا المغرور ....
وتاني بقول ..
انا المغرور
انا اللي غيري لو ما يعتر في وطن زيك
يلف يدور !!


جميع الحقوق محفوظة لمدونة اصحى يا مصر

الأحد، أغسطس 26، 2012

سطر ف كتاب


كل الكلام الحلو ليكي سطر ف كتاب ..
واقول فيكي المديح بيسرح عقلي في الملكوت
وقلبي اللي مال ليكي كسب فيا مليون ثواب
من كتر ما بيسمع غنايا دندن ورايا وقال بالصوت
لو يساوها بالألماظ ..يصبح الالماظ تراب
ولما شافني سكت وانا ببكي طال السكوت
بكى قلبي وصلى ركعتين لربه وتاب
****
اسف لأني مش قوي أوي في البلاغ
فمتزعليش من طريقتي في الكتابة
دي مش كآبه .. بس انا محتاج لدماغ..
اديا لما بتبتدي تكتب بتمشي زي الفطر
تبدأ ف سطر وتسيب سطر
اصل الكلام لما يزيد بحتاج لفراغ
عشان املى كل اللي فات مني بدون صبر
بلجأ للسطر اللي انا سبته
واملى فراغه ..
كلام خلاصته بتنكتب سطر ف كتاب
ميزان الكون بيختل لما بشوفك تندهي
سامع غنا .. سامع بكا ..سامع آنين
مهو ياريتك تسمعي
هتعرفي انا ليه بكون واقف هنا
واقف حزين !!
بشوف عنيكي لوحدها...
وكأنها .. تحويشة عمري من الدموع
سايلة على خدود الورق
بين السطور قلمي اتسرق
بين السطور انا قلبي داب
وكل الكلام اللي عشانك اتخلق
سطر ف كتاب ..
والكتاب لما انتهى بقت صفحاته مهجورة
مفضلش منك غير اسرار ..
مفضلش منك غير صورة 

مفضلش غير شرخ ف جدار 
في نفس اسوار المكان 
جمعنا زمان .. نفس الحوار
وكل اللي دار في بعادك مش عارفاه 
معذورة
القلب مال على صورتك كان فاكرها في الاصل أصل !!
مش صورة .. لازقة ف جدار 
ندمان  في بحرك يا سما دليني على مراسية
زعلان على شوق انتحر ياعيني مين يواسيه
عمال انادي انا والقلب مابيسمعشي مين يناديه
رميت شكوتي للندى ، رد الندا بعد الغياب
كل الكلام ده ميساويش .. سطر ف كتاب



جميع الحقوق محفوظة لمدونة اصحى يا مصر